ماهو البنات لازم تتجوز..!

(°°ღ♥ღ °°) ماهو البنات لازم تتجوز..! (°°ღ♥ღ °°)









بصراحة كده الحب عمره ما كان وحده كافي علشان الزواج يستمر وينجح. والحب حاجة حلوة وجميلة وممتعة. لكن حب إيه اللي يقدر يصمد لما تكون العين بصيرة والايد قصيرة.
ومعظم حالات الطلاق هذه الأيام بتكون بسبب مشاكل مادية وعجز الزوج علي انه يوفر احتياجات بيته ويدلع مراته ويكمل أيام الحب بنفس الطريقة فسح وخروج ومطاعم وسينمات وهدايا.






فبعد الجواز الحياة بتبقي حاجة تانية.. الحب بيأخذ اجازة طويلة.. وبيتجمد مع مطالب الدنيا ومابيبقاش فيه غير كلمة هات وبس.. ولو مفيش هات.. فيه مشاكل.. ومشكلة ورا مشكلة والحياة بتبقي مستحيلة والحب بيبقي ذكري.
وعلشان كده بنات الأيام دي بقوا واقعيين قوي قوي.. والواحدة من دول تقولك.. حب إيه اللي إنت جاي تقول عليه. ياسيدي حبني براحتك بس المهم تكون قادر علي الحب وتكاليفه ويكون جيبك علي طول مليان وحسابك بالبنك عمران وما تقولش أبدا لأ..!








ولأنهم بقوا واقعيين وعارفين سكتهم فين. فمنهم اللي اختارت تتجوز العجوز وتحب الشاب.. وهذا أحبه وهذا أريده والنهاية طبعا معروفة والحدوتة قديمة.. والعب ياشيطان العب ياشيطان دا البيت أصبح في خبر كان..!




ومنهم اللي قالت طيب وليه اللف والدوران. المهم نلاقي ابن الحلال. ومش مهم يكون متعلم ولا حتي ابن ناس. المهم يكون شبعان وعنده الامان لأن الأزمة طاحنة والعوانس كتروا.. وفي بلدنا 9 مليون شاب وشابة تجاوزوا الخامسة والثلاثين من أعمارهم دون زواج ومفيش فرصة لا للاختيار ولا للتفكير..!



وأصحاب الفكر ده قالوا نتجوز وخلاص وأهو ضل راجل أحسن من ضل حيطة. ووزارة العدل قالت في أحدث احصائية ليها ان فيه اكتر من 200 ألف فتاة حصلوا علي شهادات عليا ومع ذلك راحوا اتجوزوا أثرياء مصريين من غير المتعلمين من اللي يقدروا يؤثثوا منزل فخم للزوجية ويغرقوهم هدايا ومجوهرات وملابس..!






والدراسة بتقول ايه كمان.. بتقول ان الفتاة لم تعد تهتم لا بقوة شخصية وثقافة الرجل ولا بحسبه ونسبه وانما أصبح كل اهتمامها منصبا علي مدي قدرته المالية التي تمكنه من تلبية كل طلباتها.
والبنات في كده معذورة.. ما هو البنات لازم تتجوز دا البنت بتتولد في اللفة بتحلم بالزفة. امال يعني تقعد مستنية الفارس اللي هاييجي يخطفها ويأخذها علي ضهر حصان أبيض ويقول لها شبيك لبيك أنا ملك ايديك..!






الكلام ده خلاص راحت عليه. والفارس من دول اللي معاه فلوس بيروح يتجوز واحدة برضه معاها فلوس. والفلوس بتتجوز فلوس. والحسب والنسب بيدور علي اللي زيه. دا الجواز بقي صفقة وتجارة وشطارة أكثر منه حب وعشرة وحنية.




ولأن زمن الفرسان أصبح في الأفلام بس.
فبنات اليومين دول بطلوا يحلموا وعاوزين يعيشوا الواقع..
وميكانيكي ميكانيكي مادام واد كسيب وجدع. وحتي لو كان بتاع التلات ورقات مش مهم..
المهم معاه كام وبيكسب كام وعربيته نوعها ايه بدل ركوب الأوتوبيسات وبلاويها ولا الميكروباصات ومصايبها.. ولا التوك توك وبهدلته..!





وصحيح ان معظم جوازات الطريقة دي بيكون مصيرها الطلاق في النهاية. لكن الطلاق في الحالات دي مسئولية الزوجة المتعلمة اللي مقدرتش تفهم انها مش متجوزة من نجيب محفوظ..
دي متجوزة واحد يمكن ما يعرفش يفك الخط..
وهي اللي لازم ترفع من شأنه وتعلمه..
وتخليه قريب منها. هي اللي اختارت وهي اللي عليها تكمل المشوار.
مش عاوزة فلوسه وبس وبعدين تشتم فيه وتتعالي عليه وتعامله كأنه عبد عندها أو خاتم سليمان اللي عليه ما يقولش لأ..!






ولازم الكل يفهم ان الجواز ده مش لعبة.. مادام حصل يبقي فيه مسئولية. فيه تضحية. فيه خد وهات. فيه تنازلات.. وقبل كل شيء لازم يكون فيه احترام. والراجل راجل والست ست. وماتنقلبش الأوضاع وتبقي الست هي الراجل والراجل ست لأن الراجل ممكن يقبل الوضع ده لفترة علشان يرضيها ويخليها تهدي وتستقر. لكن بعد فترة بيقول ملعون أبوها جوازة. ياللا مع السلامة. البلد مليانة بنات وفيه مليون واحدة مستنية اشارة..!





واللي بتتجوز الأيام دي تحمد ربنا وتشكره وتصون بيتها وتربي ولادها صح. وتعيش علي الحلوة والمرة وتنسي اللي بتشوفه في أفلام الأيام دي اللي لحست دماغ البنات وطيرت عقولهم.. وياريتهم يشوفوا بس أفلام زمان اللي كلها دروس وعبر واللي لما كانت الزوجة أو الأم فيها حاجة يتعمل لها تمثال.. وكفاية لما كانت الواحدة فيهم دموعها بتنزل كنا بنقعد نعيط معاها ونشوف فيهم أمهاتنا اللي ما عرفوش من الدنيا الا الصبر.

عسل يا ساسو عندك حق والله الحب ولا بيعيش وبياكل ولا بيورينا يوم حلو