#محدش ضربه على إيده#

هو فى عيونها....
وهى فى عيونه..

هو... شايفها جبارة ومفترية وقاسية وظالمة وهى سبب كل المصايب إلى حاصله له, ويتمنى يخلص منها قبل إنهارده قبل بكره فيفضل يشتكى منها ويدعى عليها ويبينها كأنها شيطانه قدام الناس واللى بيشوف كده يقول إنه كان مغصوب على الجواز منها ولا كان فيه حب ولا قصص ولا أى حاجة من دى.

هى... شيفاه نمرود ومهما تعمل له أو تخدمه ما بيتمرش فيه وهو السبب فى الضغط والسكر والقولون والامراض اللى جات لها كلها وكرهت عيشته وعياله وكل اللى يربطها بيه, ولا كانها إتحدت العالم بحاله عشانه وعشان حبه.

هو... يفضل يكتب فيها قصايد غدر وكدب وخديعة ويشردها شعرا ونثرا وكل حاجة.

هى... تقعد تغنى الأغانى الخايبة العاطفيه وبعدها تتحسر على نصيبها وتقول أدى الناس ولا بلاش.. جاتنا نيلة فى حظنا الهباب.

يعنى من الأخر إحنا شايفين إن هو فى عيونها شيطان..... وهى فى عيونه عفريته,